2Ki 24 | ZomZIV | STEP | Jehoiakim uk laitakin Babylon kumpipa Nebuchadnezzar in a gam sima, kum thum sung ama innteng a suak hi. Ahi hangin tua hun ciangin a lungsim khenga amah in Nebuchadnezzar a lehdo hi.

2 Kings 24

1 Jehoiakim uk laitakin Babylon kumpipa Nebuchadnezzar in a gam sima, kum thum sung ama innteng a suak hi. Ahi hangin tua hun ciangin a lungsim khenga amah in Nebuchadnezzar a lehdo hi. 2 TOPA in Babylon-te, ^{▼▼24.2 Ahikeh Chaldea-te} Aram-te, Moab-te le Ammon-te pan galte ama langah a dosak hi. Ama nasem kamsangte tangkona tawh kizui-in Judah a susia dingin TOPA in amaute a sawl hi. 3 Manasseh mawhnate le ama bawlsa mawhnate, mawhpengte sisan a luansaknate khempeuh hangin ama ompihna pan a khenkhiat theih nadingin TOPA thupiakna tawh kizui-in Judah tungah hih thu a tung taktak ding hi. 4 Amah in mawhpeng sisan tawh Jerusalem kidimsak ahi manin TOPA in a maisak nuam kei hi. ^b

5 Jehoiakim uk sunga thupiang dangte le ama sepsate khempeuh Judah kumpite khangthu ciamtehna laibu sungah kigelh khin hi lo ahi hiam? 6 Jehoiakim a pate tawh tawlnga khawm hi. Tuateh a tapa Jehoiachin in a kumpi za a luah hi. ^c

7 Babylon kumpipa in ama gam khempeuh, Egypt Wady panin Euphrates Gunpi dong laksak khin ahi manin Egypt kumpipa ama neihsa gam panin a kuankhia kik nawn kei hi. ^d

Judah Kumpi Jehoiachin

8 Jehoiachin kumpi a suahin a khan kum sawm le giat pha a, Jerusalem ah kha thum sung a uk hi. A nu min Nehushta hi-a Elnathan tanu ahi hi; Jerusalem pan ahi hi. 9 Amah in a pa hih bang tektekin TOPA mit ah a sia-in a gamta hi.

10 Tua hun laitakin Babylon kumpipa Nebuchadnezzar uliante Jerusalem ah kuanto uh a, a umcih uh hi; 11 ama uliante in a umcih laitakun khuapi ah Nebuchadnezzar mahmah a paito hi. 12 Judah kumpipa Jehoiachin, a nu, amah cingte le a uliante khempeuh ama tungah a va lut uh hi.

Babylon kumpipa in a uk a kum giatna kumin Jehoiachin thong sungah khum hi. 13 TOPA gensa bangin Nebuchadnezzar in TOPA biakinnpi pan le kumpi-inn panin goute khempeuh puakhia a, Israel kumpipa Solomon in TOPA biakinnpi-a zat dingin a bawl kham vanzat khempeuh a puamang hi. 14 Amah in Jerusalem-te khempeuh: a uliante khempeuh, galkapte, le khutsiamte le nasep siamte khempeuh - a vekpi in tulsawm, salin a kai hi. Gammi a zawng pente bek a nusia lai hi. ^e

15 Nebuchadnezzar in Babylon ah Jehoiachin salin a kai hi. Amah in kumpipa nu, a zite, a uliante le gam sunga makaite zong Jerusalem panin Babylon ah a paipih hi. 16 Babylon kumpipa in gal sim thei mi thahat khempeuh galkap tul sagih le khutsiamte le nasep siamte mi tul khat zong Babylon ah nawhkhia hi. 17 Amah in Jehoiachin pano Mattaniah ama mun ah kumpi suaksak a min laihsakin Zedekiah a phuak hi.

Judah Kumpi Zedekiah

18 Zedekiah kumpi a suahin kum sawmnih le khat pha a, Jerusalem ah kum sawm le khat sung a uk hi. A nu min Hamutal hi-a Jeremiah tanu hi; Libnah pan ahi hi. 19 Jehoikim hihsa bang tektekin TOPA mit ah a sia-in a gamta hi. 20 TOPA hehna hangin Jerusalem le Judah tungah hihte khempeuh a tung hi-a a tawpna ah ama ompihna panin amaute a hemkhiamang hi.

Jerusalem Pukna

Tu-in Zedekiah in Babylon kumpipa a lehdo hi.